الشعر فكر وله أساليب واوصول
الله يجملني معه لا بنيته
لكن بعضه شيء ماهو بمعقول
لو يعترض لي في طريقي وطيته
واللي قصيده غث ماهو بمقبول
انا على الضلع القصير كويته
وان مالقيت لعلته طب و حلول
جنبت عنه وكنني مالقيته
وان صد هاجوسي فانا غير مسؤول
كم دعوة عنها قفل باب بيته
اصد عنها بغير قوه ولا حول
يالله تعين اللي عليها حديته
كم دعوة لا جاتني قلت مشغول
عذر يخارجني متـــــــــى مابغيته
وكم دعوة من دون لااشعر على طول
القى هجوسي يمها مستميته
هذي هي اللي لاجلها اقول واطول
بحر القصيد اللي فـ صدري حويته
والدعوه اللي جاتني من ابن هذلول
لو دونها الالفين كيلو مشيته
وهايل ليا منه دعاني وش اقول
قرم. يجمل. لابته. لا نخيته
سادة حمادين لهم مجد وافعول
رجالهم راعي هلا لا نصيته
حي الذراع اللي من العز مفتول
اللي ليا جات اللوازم لقيته
قام النخيش بفعله يصول ويجول
باسم النفيعي عزوته لا دعيته
فيهم صناديد مواقفهم تهول
في صفحة الامجاد فعل قريته
واخص منهم شيخ ماهو بـ مجهول
(فيحان) بن هذلول ابـــد ما نسيته
انا ثبيتي وافتخر فيه واقول
منومس عتابه بفعله وصيته
ربعي ثبيت وكل باب وله قفول
فـ يدينهم حبل المدايح ثنيته
افخر بهم والفعل لايمكن يزول
وماقفهم اليا جيت دونه حميته
واختامها صلوا على خير مرسول
اللي لو اشرب سيرته مارويته
فايز سراحان الثبيتي
ليست هناك تعليقات:
إرسال تعليق