(
بعض الكلام اللي دخوله اجباري
اسمه حقيقه مير بلحيييييل مررّه
وبعض السكوت ايفوق حد الشباري
في صف شهران وعبيده ومرّه
وبعض الكلام ايمر مر الذواري
لا ضاق له صدري ولا فيه سرّه
طيبه وخبثه من غصون الشجاري
فيه الثمر والشوك مره ومره
بين الصقور الهايمه والحباري
وقفت مع نفسي على حين غره
ياما وطيت بشعري احساس غاري
اثر البيوت الها على البيد جره
وياما غلطت وغلطتي في اعتذاري
وجلبت من نفسي لنفسي مضره
بعض الخطا ماله عذر يامشاري
مثل الشتاء مكروه برده وحره
وبعض الخطا كنه دوي السواري
من كف عودٍ في ضحى العيد مره
ورعه واصابه منه طلق ٍ عياري
عبرودها بين الحنايا مقره
شاله على يمناه فوق السفاري
وحيده اللي مابعد شاف برّه
ويوم اخبروه بموتته فـــ الطواري
غمض عيونه للنفس لين جره
هذا الخطأ اللي له تهل العباري
للي تبى خيره ويلحقك شره
ولا الثياب اللي تسمى العواري
من جرب الدنيا فهي ماتغره
فايز سراحان الثبيتي
ليست هناك تعليقات:
إرسال تعليق