احتزم ياهاجس الشعر وابرك للثقال
تقضي قصار الدعاوي لزوم طوالها
الشعر وهبه من الله ولله الكمال
وشرهة حمول الركايب على جمالها
الشعر ماهو بمكسب ولا هو راس مال
كلمةٍ قبلي ثلاثين شاعر قالها
سلعةٍ مدري حرام اخذها ولا حلال
قامت تبث القناوات منه رسالها
لين قام يكف يمناه ويمد الشمال
شلةٍ ترعاه فال الله ولا فالها
مير في بعض المواقف الياجاله مجال
كم رجالٍ بالشكاله رجح مكيالها
شاعرٍ يكتب ويبدع ويسبح فالخيال
وان تعرض للثقيله برك وشتالها
تحتزم به ربعه فكل حين وكل حال
من يدينه كل عقده لها حلالها
ان سكت يسكت على عزوليا قال طال
مبطي كبار الدعاوي شرب فنجالها
وشاعرٍ عاله على الشعر وعلومه طوال
وده ينوش الطويله لكن ماطالها
حالفٍ ليصير شاعر لو بخشم الريال
والشعر من عقبه فحالةٍ يرثالها
ودك تحطه مع القهوجي عند الدلال
لابغيت تنزل القوم في منزالها
مثل هذا ودك تقول له يابن الحلال
استر بيوتك عسى الله يستر حالها
وكان صامل روح سولف بهالام العيال
الثقيله مالها الا ظهور جمالها
قالها راع المثايل وعز الله قال
(الله يخلي لبعض الرجال رجالها )
ليست هناك تعليقات:
إرسال تعليق