راكب اللي قيمته شيك يودع فالرصيد
راعي التقسيط لاشافه يجنب عنه
مايورد فالجميح و وكالة بالبيد
رنج روفر نص مليون فالشيك ثْمنه !
سايقه دايم محزيه للدرب البعيد
لابداله لازمٍ مالقى الفكه مْنه
بصمته لادق سلفه كما ضحكات غِيد
اربعٍ في ستر عودٍ يحوفن ضْعنه
وكن صوت محركاته طواريق ( آل لبيد)
لا نهض بالبيت الاول وهدّا في لْحنه
وان عطىٰ خط الهدا تاجده في كل سيد
سبحةٍ في كف شيخٍ تحداه زْمنه
سرعته لامر ساهر تقول انها تزيد
من طناخة راسه الكيمره ماتضمنه
صوب مكه وجهه ثم تلّه من جديد
تلة اللي جوه غفله بورعه واحظنه
وان بدا له وجه جِده حصل له مايريد
فرحته فرحة غريبٍ ليا شاف وْطنه
زبنه شيخ المواقف راع المجد التليد
في ذرا قصرٍ على الطيب والعز سْكنه
ياعتابه بيرق المجد ( تركي ابن حميد )
الاسم والفعل والطيب ماخذها مْنه
تركي ابن عمر يالله عسى عمره مديد
ماتشوف الا كرم خاطره قبل صْحنه
شاش راسي من فعوله على نظم القصيد
هاجسٍ صح الله لسانه وصح بْدنه !!
#فايز_سراحان
ليست هناك تعليقات:
إرسال تعليق