ياشعر النبط لاهنت ومقدر ومحشوم
ابطلق سبوق افكاري ،، بكل عفويه !!
على الرحله اللي كرتها جاهز ومختوم
وعلى جنبها شعار ،، الخطوط السعوديه
ابوقف على المشهد واركب عليه الزوم
بوجهة نظر ماهي من النقد محميه
مجرد صور وابحطها داخل الالبوم
لكنها جديده كلبوها ،، وحصريه !!
ياشعر النبط وجهك تقول انه الديموم
وبيوتك حجر ماهي من الطين مبنيه !!
عينت الصقور اللي بدوا يكسرون الحوم
ومخاليبهم من شرّد الصيد مدميه !!!
وياكم شاعرٍ مات ولقى يومه المحتوم
بيوته اليا هالحين في صدورنا حيه !
تقدم له التاريخ واصدر عنه مرسوم
تقول انه مسوي من الشعر منقيه !!
علام الفضاء كبده ياراع القصيد تسوم
هذا شي سبب للمشاهد حساسيه
الاعلام سوى مشكله حلها معدوم !!
لاحط العشاء فوق الصحون الفضائيه
لو ان القصيد الهزل يفرض عليه رسوم
فقدنا من الشعار ( ٥٠ ) ٪
مابين الوزن والقافيه فيه دق خشوم
مايدري بها اللي ضاريٍ بالرفاهيه
وانا شاعر ولاني من اللي حصل معصوم
وقوفي في وجه الشمس يكسر لي الفيّه
لكن من فضل ربي لاجاء فالعلوم علوم
الي هاجس ٍ فوق العدود الرهاويّه
على منكبه 👑 و ✂️ و ثلاث نجوم
ولا يقلط بي الا فالصفوف الاماميه
لو انه بعض لحيان يحرمني من النوم
اليا ضاق ثم هبت عليه الشماليه !!
ياطيب المواقف لاتقدم لها الزيزوم
هذي والله افعول الرجال الحقيقيه !!
ليست هناك تعليقات:
إرسال تعليق