اعطاني الشباك جرعة اكسجين
يوم انفتح فجأه وفز له الستار
على مسافة عمر مدري خطوتين !
عانق عمود النور ذرات الغبار
قمت اتأمل في بقايا جدار طين !
خلف السياج ابو العناقيد الصغار
الورد كان حكاية العصفور لين !!
الشمس من لون المساء لبست خمار
عمري قضيه شايكه وانا سجين
وخسارتي كانت بطعم الانتصار
أستوطن عيون الاماكن والسنين !!
في رحلتي لاصعب زوايا الانكسار
على خُطى الايام مثل العابرين
في زحمة اللا وعي واللا اعتبار
كل شيء فقدته ماعرفت انه ثمين
لين اتعبتني سالفة ( فات القطار )
رغم ان في صدري وطن للاخرين
اخطائهم كانت على شكل اعتذار
حتى الغروب اللي نصب شمسه كمين
بكره يقول انه ملاني بالوقار !!
شمسه هذيك الباذخه ذات الجبين
اللي وراها كوكب العمر استدار !!
مجنونة الاحساس بنت الفرقدين
وحيدة اللحظات سيدة المهار
مرت على اهدابي مرور العاشقين
تستدرج اطراف النظر للانتحار
الفاتنه لمتني بيدها اليمين
واخذت حياتي بين اناملها الصغار
وانا ارتمي فـ احضانها واقسى والين
لين اشبكت بيمينها يدها اليسار
لكنها غابت وانا كلي يقين
بأنها سر القضيه باختصار !!
غابت وصارت في عداد الراحلين
وقامت تصب الليل ف عيون النهار
على امل بكره يرجعها الحنين
صار العمر كله وداع وانتظار
غابت وكل شيء كان يرقبها حزين
الورد والعصفور وانا والجدار
كنا اربعه والاربعه صاروا اثنين
ذبلت غصون الورد والعصفور طار
#فايز_سراحان
