وجودي على اللي من ورىٰ طرفها الخَدْر
هجرت القصيد اللي قصر عن وصوفها
لو تروح باق ايام عمري لها هدر
ما يلحق سوا اللي فات منها حسوفها
احوف البيوت ولا انتقي غير ماندر
اليا حافني شوقي لها قمت احوفها
لها لبةٍ في ضيها تشبه البدر
ولها لدةٍ خطره على اللي يشوفها
سليلة شيوخٍ يوم حطوا لها قدر
قامت تكسي البشت الحساوي كتوفها
يعانق مفاتنها عن العنق من حدر
بعد ضمته ياكثر فيه معروفها
حدر عن مناكبها على زمة الصدر
وتعطف عليها لين صافح كفوفها
بغى يلتوي فـ يدينها مير ما قدر
تقاصر وقام الضيق يلحق ردوفها
فايز سراحان الثبيتي
