/
هاجسي بحر تلاطم غبته في جاله
لي ثلاث شهور امني خاطري بهدوه
كل ماصدر عن الجمه واكف حباله
شاقني برق من ثبيت يتداحم نوه
ادّرج حبل القصيد ودارت المحّاله
وانتثر صبح القوافي لين شعشع ضوه
بين سكرات القصيد ولعبة الحياله
الشعر ماهو بتوه لكن اللي توووه
استعدوا وارصدوا. موجات بث رساله
ربما هذي مواعيده وهذا جوه
القصيده بنت ريحٍ تتعب الخياله
مهرةٍ شقرا عصاها في يدي محنوه
الشعر ماهو كلام من طراله قاله
مايعرف اسراره الا من سرح في دوه
شاعر وفي كل ماقف لي هدف ورساله
انما ياحضرة العرّاف احب انوه
الكفو يبشربي اليا احتاجني واناله
والله ان كن بيني وبينه نسب وعنوه
لانخاني سقت نفسي فاللزوم بداله
ولا نخيته ساق لي وجهه سطر ومروه
والذي يقصر عن الهقوه يريح باله
قبل يمشي في طريق للرجال يتوه
واحد ماهو بكفو المجد لايعناله
مايجيه بفعل مرّ وهرجةٍ محلوه
مايخلد سمعة الرجال غير افعاله
واسفل المجد يهبى ماهو بمثل علوه
واحد من طيب راسه يفخرون عياله
و واحدٍ حتى بني عمه تكافا سووه
المراجل بالغصايب والفخر يبغاله
مير كلمة والنعم ماتنوخذ بالقوه
والنعم تغشى خنيفس جمل الله حاله
كن وقفاته بديباج الوفاء مكسوه
وصلت جهوده سحاب المجد حتى ناله
وقال للي فوق الارض اللي تريده سوه
جعل وقفاته تسجل في رصيد اعماله
وجعلها ترجع عليه برحمةٍ مرجوه
حفله لتكريم ابو ركبه يسد لحاله
هكذا فعل الكرام وهكذا الاخوووه
ايه ابو ركبه وابو ركبه قليل امثاله
مسفر اللي سيف للحق وخطيب مفوه
شيخ دين وشيخ عرف وشيخ قوم وطاله
نجم لامع فالسماء مبطي ولا هوو تووه
ولا يبى يطفي سناه وسامي من عياله
بارك الله فالرجال مسددين الهوه
ياثبيت اختارنا محمد وصرنا اخواله
صلو وزيدوا صلاه لحضرته وسموه
فايز سراحان الثبيتي
